Fagstjóri meistaranáms í haf- og strandsvæðastjórnun er Dagný Arnarsdóttir. Hún hefur lokið meistaragráðu í umhverfis- og auðlindastjórnun frá Háskóla Íslands. Í meistararitgerð sinni rannsakaði Dagný félagslegar skyldur stórfyrirtækja á Íslandi og byggði á sambærilegri aðferðarfræði og rannsakendur hafa notað til að greina orðræðu um loftslagsbreytingar í nágrannalöndunum. Samhliða meistaranámi sínu á árunum 2006-2009 starfaði Dagný sjálfstætt að ýmsum verkefnum. Hún starfaði fyrir Sérfræðinganefnd um minnkun nettó losunar gróðurhúsalofttegunda, var í starfsnámi hjá Umhverfisstofnun Íslands þar sem hún lagði til sjálfbærnivísi fyrir Ísland, vann að verkefnum fyrir Félag umhverfisfræðinga á Íslandi, kenndi siðfræðinámskeið hjá Námsflokkkum Reykjavíkur og sem verkefnastjóri við meistaranám í umhverfis- og auðlindastjórnun hjá HÍ. Loks má nefna að Dagný hefur verið virk í félagsstörfum. Veturinn 2007-2008 var hún forseti Gaiu, félags meistaranema í umhverfis- og auðlindafræðum. Í apríl 2011 mun hún taka við formennsku Félags umhverfisfræðinga á Íslandi (FUMÍ).
Dagný hefur starfað sem fagstjóri meistaranáms í haf- og strandsvæðastjórnun við Háskólasetur Vestfjarða frá desember 2009.
Fagstjóri meistaranáms í haf- og strandsvæðastjórnun hefur eftirfarandi hlutverk:
- Fagleg umsjón með meistaranáminu, utanumhald og samræming námsskrár
- Tengiliður milli Meistaranámsnefndar, starfsfólks Háskólaseturs og nemenda í haf- og strandsvæðastjórnun
- Leggur til ráðningar nýrra kennara, leiðbeinenda og prófdómara, við Meistaranámsnefnd
- Greiðir fyrir samstarfi og hlúir að tengslaneti vegna námsins, utanumhald kennarahóps
- Svarar eða kemur áfram öllum spurningum er varða faglega þætti meistaranámsins
- Hefur yfirlit yfir námsframgangi nemenda, hvort þeir haldi áætlun, bæði í námskeiðum og á þegar kemur að vinnu við lokaritgerðir
- Hefur umsjón með námsmatsferli lokaritgerða, þar með talið kynningum (fyrirlestrum) og vörnum
